بمناسبة احتفالنا بعيد الميلاد التالت للموقع كل سنة وكل مشروع ومشروعة طيبين وبخير
مشروع دكتور بالنسبة لنا مكانش مجرد أسرة ونشاط وخلاص .. الموضوع كان أكبر من كده
عارفين أصعب شئ كان بالنسبة لنا ايه ؟ كان افتقاد الذات في كلية رتيبة وطويلة ؟
ان احنا حاسين ان جوانا طاقات كتير بس مش عارفين نطلعها
لسه فاكر كويس وأنا في سنة تانية لما رحت اشترك في معمل الكمبيوتر في الكلية وقالولي " روح يا شاطر هات ما يثبت انك تعرف ويندوز !! " روتين ورتابة في كل شئ أنا أزعم بدون مبالغة إن أي نشاط في كليتنا قبلنا كان علشان أغراض تانية تظبيط انتخابات وغيره ..
بالنسبة لي أنا مش قادر اقلكم الاسرة غيرت مني ازاي زي ما غيرت في ناس تاني كتير
ـ في الاسرة دي اتعرفت علي زملا ولاد وبنات بحس بجد انهم اخواتي
ـ في الاسرة دي اكتسبت حاجة مهمة جدا وهي فن التعامل مع الآخرين انا فاكر كويس زمان ما كنتش بعرف اقول كلمتين علي بعض ومهارات شخصية كتير اكتسبناها .. ـ
ـ في الاسرة دي حسيت اني الهواية ليها قيمة .. ـ
ـ الاسرة دي علمتنا انكار الذات كلنا بنشتغل لصالح كيان واحد وهو " مشروع دكتور " ما حدش فينا بيدور علي مناصب ولا مجد شخصي
ـ اللي أكتر من كده الاسرة دي جمعت ناس ببعض وارتبط مصيرهم ببعض وربنا يوفقهم
ـ مش هقدر أوصفلكم يا مشاريع احنا تعبنا ازاي في البداية علشان نعمل كيان اسمه " مشروع دكتور "
ـ بجد بجد كل اللي بنطلبه منكم سيبكم من اي تفاهات وحافظوا عالكيان ده
للأسف انتوا مش هتحسوا بقيمة الكلام ده غير لما تخلصوا وتبصوا لصوركم وتتحسروا عالذكريات فحرام تضيعوها
يا ريت تكونوا فهمتوا كلامي ده
وبعد سنوات الدراسة الطويلة في الكلية ..مزعلتش على حاجة سبتها قد ما زعلت على الأسرةاحنا خلاص راحت علينا وكبرنا هناخد زمننا وزمن غيرنا .. بس ياريت تفتكرونا بالخير
4 comments:
رفيقي العزيز أحمد موافي ... طبعا كلامك طلع من القلب ووصل لقلوبنا كلنا.. مفيش حاجة تاني ممكن تتقال
فيا كل المشاريع الكبير منكم والصغير.. "مشروع دكتور " دي ثورة.. ثورة على كل ما هو تقليدي ورتيب في كليتنا .. ثورة على كل الأفكار المتهالكة والمثبطة.. ثورة على أسلوب تعليم خاطئ .. مشروع دكتور هي مشروع انسان مش مجرد حاجة ترفيهية...
عشان كدة عاوزينكم تحافظوا عليها وترفعوا اسمها أكتر وأكتر.
اتمنى ان احنا نشوفكم قريب على خير ويارب نسمع عنكم أخبار كويسة.وادعولنا
صديقي اللدود الجميل والجامد جدا موف بعد التحية
كلامك أثر فيا جامد أوي وكمان صورة المشاريع اللي كانوا بذرة الشجرة الجميلة اللي إسمها مشروع دكتور...ومن موقعي ده بحب أقول إن كل مشروعجي ومشروعجية بيستظلوا بظل "مشروع دكتور"عليهم حق مش هيقدروا يوفوه ولا هيقدروا يردوه للسيد أحمد موافي ..وانت ياموف عشان تواضعك اللي عودتنا عليه الناس مش عارفة حقيقة واحدة هيه إنك أول بذرة عملت الموقع وانت أصلا صاحب الفكرة وانت صاحب الإسم الجميل ...كل ده كان توفيق من ربنا ثم بإبداعك....1
أنا فخور لأني مشروعجي..وفخور لأنك ياموافي صديق حميم ليا..والشعور اللي حسيته لما شفت الصورة شعور لايوصف...ربنا يديم مشروع دكتور على خير يارب ويبعد عننا عيون الحاقدين ويجمع بينا على خير إن شاء الله
وكلمتي للمشاريع الأصغر مننا سنا:اللي عملناه كان أول خطوة في طريق الرقي الإنساني لشخص كل واحد مننا..اللي عملناه ده كله مكنش غير بداية صغيرة لازم إنتوا تكملوها..ياجماعة الإبداع ملوش سقف..واللي هيقول اننا وصلنا للسقف ومفيش جديد يبقى جاهل وميستحقش يبقى مشروعجي
ربنا يوفقكم ومتنسوناش من صالح دعاءكم
تحياتي
موافى
اخويا الكبير
والوب ماستر بتاع الأسرة
انا مش عارف أشكرك انت حصوصا اذاى
لولاك انا مكنتش عرفت للكلية طعم
ومش ممكن انكر فضلك انت ولا محروس ولا حازم ولا عمرو عاطف عليا
وكفايا انكم سبتوا لينا اسرة ...ليها أسم ومكانة عالية
ده فخر لينا انحنا نكمل وراكم
واتمنى ان الناس تعرف فكر مشروع دكتور اكتر
انا ممكن اتكلم للصبح ومش حقدر أوفى حقكم
اللى بينا أكبر من الكلام واعمق من مشاعر نحسها تجاه بعض
أحمد عبد النعيم مشروع دكتور
أولا يا موافى أشكرك على النيو لووك بتاع الملتقى بجد تحفة وتجديد يليق باسم الأسرة وعيد ميلاد الموقع أعتقد أنها هدية قيمة منك للموقع
ثانيا:شكرا على الكلام الجميل ده أعتقد ان ده الكلام اللى حسه كل من دخل الأسرة من أول مادخلت الأسرة وابتدينا نشتغل حسيت بجد انى مع أخواتى والأحساس ده كل مادا مابيزيد الكلام عن الأسرة كتير ومش بيخلص بس انا بجد بحمد ربنا انى عرفت ناس محترمة زيكوا..يارب نحافظ عالأسرة دى ع قد مانقدر ونحافظ ع الروح الجميلة مابنا
ربنا يصونها ويحفظها ويبعد عنها عيون الحاقدين والحاسدين.....اللهم أمين
Post a Comment