الكل بيسمع الكلمتين دول لكن مين بيطبق
لو كل واحد فكر شوية هيعرف معنى الكلمة دى وتأثيرها على علاقة الناس ببعضها
انا اللى اعرفه واتربيت عليه ان لما يكون معايا مشكلة باروح وافضفض لاختى ا او اخويا
مش شرط يكونوا اخواتى الشرعيين لكن اللى اعرفه ان الاخ هو اللى يشيل عنك همومك ولو احتاجته فى اى لحظة تلاقيه قدامك
مش بس كده
لكن اخوك هو اللى لما تحتاج نصيحة يديلك ولما تغلط برضة يديلك(فوق دماغك) اهم حاجة انه بيخاف عليك
لكن للاسف اشخاص كتير بيمشوا الحياة كلها مصالح
انا بأقولهم ماتحاولوش تقربولى
واحسنلهم يتقوا شرى.....
9 comments:
أنا أرد عليك و أقلك
أبشرك إنك مستحيل حتحقق اللي بتحلم بيه
حناخدهم واحدة واحدة
أخوك اللي انتا عايز واحد من صحابك يبقى زيه اديك انتا قلتها في الآخر الدنيا مصالح... ماشي يا عم الحج إفترضنا انه طلع كويس و عشرة على عشرة و مش مصالح إه ضمنك انك لو حكيتله سرك ميقولوش لحد
و غيه ضمنك إنك لو اتخانقت معاه يوم ميرحش يقول للناس كلها سرك ده... فا كدا مينفعش تحكي لحد
ثانيا أختك اللي انتا عايز واحدة من زمايلك تبقى زيها برضو مش ممكن حتعرف تحكيلها كل حاجة من همومك و مشاكلك و حتى لو حكيت مش حتلاقي اساسا حد في زمانا ممكن تسمعك بالساعة و الساعتين و انتا بتحكي اولا علشان لا عرف ولا دين حيسمح بكده و كمان لأنك حطلع عليها كلام و سمعة و حشة على الفاضي .. فا بطمنك حتى لو لقيتها هيا مش حتلاقيك لأنها أكيد حتبقى محترمة و مش عايزة تجيب لنفسها الكلام.
نصيحة يمكن أنا مبعملهاش -وده تقصير مني- لما تلاقي نفسك زعلان و مخنوق أدخل على السرير إطفي النور و شغل قرآن و فإيدك لو عايز كباية الشاي و ادعي ربنا
أو صليلك ركعتين فضفض فيهم لربنا ، أأمن واحد ممكن تحكيله
في بعد كده سكك تانية زي انك تقف في وش المراية تكلم نفسك أو تمسك ورقة تفضفض فيها كل حاجة و بعدين تقطعها ، تنزل تقعدلك على النيل ساعتين تلاتة تحكيله بالنظرات ، تنزل الجامعة بالليل زي ما كنا بنعمل و تاخد جمب ضلمه تقعد فيه... كل ده بيريح الهموم كلها و بيخليك تعرف تفكر و تحلها و كلها الحمد لله مجربها قبل كده :) فا حتنفع ان شاء الله
معلش طولت عليك
يا بو المجد ليه الصعبانية ديه كلها، أنت إفترض حسن النية فى معظم اللى بيعاملوك، و بعدين لو ثبت العكس يبقى صحبك وعلم عليه.ـ
للأسف صعب الأيام دى أنك تلاقى أخوات بجد (وخاصة مع الغرب)للأسف صعب أنك تدى ثقتك لحد.
بس فى ناس كويسة وأكتر من الأخوات الحمدلله الدنيا لسة فيها خير.
ايه حكاية اخواتك الشرعيين دى
هو انت متعقد من الشرعى للدرجة دى
ده حتى انت انت شغال رمد اليومين دول
تحياتى
صحيح نسيت اتكلم على اخواته الشرعيين
دا على أساس ان اللي انتا حتعرفهم بعد كدا هم إخواتك العرفيين
شفت ... إيه رأيك بقى ... حلوة دي أنا عارف
ايه يا هيثم الكلام ده كله لو سمحت أختصر(خير الكلام ماقل ودل)أوكى
على فكرة أنا موافق على كلامك.ومعك فى كل كلمة قلتها
وانا من الناس اللى بعمل بنصيحتك
بس فى ناس ممكن تسمعك,بس مش كل حاجةتقدر تقولها.لمنشاوى
beauty_caso
والله يا جماعة الرد مش طويل اتكلمت عن مثال للأخ و مثال للأخت و بعدين اديت رأيي و علاك
و متأسف لو كان الرد طويل :)
من ناحية تانية مش كل حاجة ممكن تقولها لأي حد لكن في واحد -و هوا اللي بضور عليه- ممكن اقوله كل حاجة في حياتي .. و برضو مصر اني حلاقيه ان شاء الله :)
ايه ياهيثم يامنشاوي ..رغاي حتى في التعليقات ... مالك انت ومال النيل وانت متلقح آخر الدنيا ولا عندك نيل ولا يحزنون...قاعد تقول للواد كلام غريب.. يابني لسه فيه في الدنيا ناس كتير كويسة ويمكن يكونوا الأغلبية كمان وأحيانا كتير بتلاقي ناس تهتم بيك وتخاف عليك اكتر من أخوك شقيقك ..(رب أخ لك لم تلده أمك) ده مثل عربي قديم
الفكرة بس انك تحسن اختيار أصدقاءك..
Post a Comment